|
Ballade IV
Biaute qui toutes autres pere
Envers moy diverse et estrange,
Douceur fine à mon goust amere,
Corps digne de toute loange,
Simple vis à cuer d'aymant,
Regart pour tuer un amant,
Samblant de joie et response d'esmay
M'ont ad ce mis que pour amer morray.
Detri d'ottri que moult compere,
Bel acueil qui de moy se vange
Amour marrastre et nompas mere,
Espoir qui de joie m'estrange,
Povre secours, desir ardant,
Triste penser, cuer souspirant,
Durte, desdaing, dangier et refus qu'ay
M'ont ad ce mis que pour amer morray.
Si weil bien qu'à ma dame appere
Qu'elle ma joie en doleur change
Et que sa bele face clere
Me destruit, tant de meschief sen je,
Et que gieu n'ay, revel ne chant,
N einsi com je seuil plus ne chant,
Pour ce qu'Amour, mi oeil et son corps gay
M'ont à ce mis que pour amer morray.
Ballade XXVI
Donnez, signeurs, donnez a toutes mains,
Ne retenez seulement fors l'onneur.
S'onneur avez et de richesse meins,
Pour vous seront li grant en li mineur:
Chascuns dira: "ci ha vaillant signeur."
Et terre aussi qu'est despendue
Vaut trop miex que terre perdue.
A vo[s] subges donnez et a lonteins,
Car mieus affiert a roy ou empereur
Qu'il doint dou sien mil livre[s] de messeins
Que on li tollist je denier par rigeur.
S'avez le cuers, ja n'ares deshonneur.
Et terre aussi qu'est despendue
Vaut trop miex que terre perdue..
Quant princes est loyaus, larges, humains,
Si don sont plain de si tres grant douceur
Que pour son fait estrainges et prochains
Ne doubtent mort, povrete ne labour,
Eins wet chascuns res[s]ambler le milleur.
Et terre aussi qu'est despendue
Vaut trop miex que terre perdue.
|
Complainte
Tels rit au main qui au soir pleure
Et tels cuide qu'Amours labeure
Et tels cuide que joie aqueure
Pour li aidier, qu'elle demeure.
Car Fortune tout ce deveure,
Quant elle tourne,
Qui n'atent mie qu'il adjourne
Pour tourner; qu'elle ne sejourne,
Eins tourne, retourne et bestourne,
Tant qu'au desseur
Mest celui qui gist mas en l'ourne;
Le sormonté au bas retourne,
Et le plus joieus mat et mourne
Fait en po d'eure.
Car elle n'est ferme n'estable,
Juste, loyal, ne veritable;
Quant on la cuide charitable,
Elle est avere,
Dure, diverse, espouentable,
Traitre, poignant, decevable;
Et quant on la cuide amiable, amere.
Car ja soit ce qu'amie appere,
Douce com miel, vraie com mere,
La pointure d'une vipere
Qu'est incurable
En riens a li ne se compere,
Car elle trairoit son pere
Et mettroit d'onneurs en misere
Desraisonnable.
C'est de Desier qui mon cuer flame
Et point de si diverse flamme,
Qu'en monde n'a home ne fame
Qui medecine y sceust,
Se ce n'est ma dame,
Qui l'art, qui l'esprent, qui l'enflame
Et bruist d'amoureuse flame,
N'elle ne fine.
Fortune est sa dure voisine
Et Amours l'assaut et lemine,
Don’t morir cuit en brief termine
Sans autre blasme.
Mais s'einsi ma vie define,
A ma dame qu'aim d'amour fine,
Les mains jointes, la chiere encline,
Vueil rendre l'ame.
|
